പ്രായം കൂടുമ്പോള്‍ ശരീരത്തില്‍ പല മാറ്റങ്ങളും ഉണ്ടാകാറുണ്ട്. നേരത്തേ ചെയ്തിരുന്ന കാര്യങ്ങള്‍ ചെയ്യാന്‍ കൂടുതല്‍ സമയം വേണ്ടിവരിക, പെട്ടെന്ന് ക്ഷീണം അനുഭവപ്പെടുക, ഉറക്കത്തില്‍ വ്യത്യാസം ഉണ്ടാവുക, എനര്‍ജിയില്‍ വ്യത്യാസങ്ങള്‍ വരിക തുടങ്ങിയവയെല്ലാം പലരും സ്വാഭാവികമായ വാര്‍ധക്യത്തിന്റെ ഭാഗമായിട്ടാണ് കാണാറുള്ളത്. എന്നാല്‍ ചില ലക്ഷണങ്ങളെ പ്രായത്തിന്റെ പ്രശ്‌നമെന്ന് കരുതി അവഗണിക്കുന്നത് ശരിയല്ല. പ്രത്യേകിച്ച് ഹൃദയത്തിന്റെയും രക്തക്കുഴലുകളുടെയും ആരോഗ്യവുമായി ബന്ധപ്പെട്ട ചില സൂചനകള്‍ നേരത്തേ തിരിച്ചറിയുന്നത് നിര്‍ണായകമാണ്.
ഇന്ത്യന്‍ എക്‌സ്പ്രസില്‍ പ്രസിദ്ധീകരിച്ച ഒരു ആരോഗ്യ റിപ്പോര്‍ട്ടില്‍ 40 വയസ്സിന് ശേഷം പുരുഷന്മാരിലും സ്ത്രീകളിലും ശ്രദ്ധിക്കേണ്ട ചില ആരോഗ്യ ലക്ഷണങ്ങളെക്കുറിച്ച് പരാമര്‍ശിക്കുന്നുണ്ട്. പുരുഷന്മാരിലെ ഉദ്ധാരണപ്രശ്‌നങ്ങളും സ്ത്രീകളിലെ വിട്ടുമാറാത്ത ക്ഷീണവുമാണ് ഇതില്‍ പ്രത്യേകം എടുത്തുപറയുന്നത്. ഇത്തരം ലക്ഷണങ്ങള്‍ മാത്രം കൊണ്ട് ഹൃദ്രോഗമുണ്ടെന്ന് തീരുമാനിക്കാനാവില്ലെങ്കിലും ലക്ഷണങ്ങള്‍ തുടരുകയാണെങ്കില്‍ കാരണം കണ്ടെത്തേണ്ടത് പ്രധാനമാണ്.
ലൈംഗികബന്ധത്തിനാവശ്യമായ ഉദ്ധാരണം ലഭിക്കാതിരിക്കുകയോ അത് നിലനിര്‍ത്താന്‍ ബുദ്ധിമുട്ട് അനുഭവപ്പെടുകയോ ചെയ്യുന്നതിനെയാണ് ഉദ്ധാരണക്കുറവ് (Erectile Dysfunction) എന്നു പറയുന്നത്. പ്രായം കൂടുന്നതിന്റെ ഭാഗമായി മാത്രം ഇതിനെ കാണുന്നത് ശരിയല്ല. ഉദ്ധാരണക്കുറവിന് മാനസിക സമ്മര്‍ദം, പ്രമേഹം, ഹോര്‍മോണ്‍ വ്യതിയാനങ്ങള്‍, ചില മരുന്നുകള്‍, രക്തക്കുഴലുകളുമായി ബന്ധപ്പെട്ട പ്രശ്‌നങ്ങള്‍ തുടങ്ങി പല കാരണങ്ങളുണ്ടാകാം. ലിംഗത്തിലേക്കുള്ള രക്തപ്രവാഹത്തെ ബാധിക്കുന്ന ചില പ്രശ്‌നങ്ങള്‍ ശരീരത്തിലെ മറ്റ് രക്തക്കുഴലുകളെയും ബാധിച്ചേക്കാം. അതിനാല്‍ ചിലരില്‍ ഉദ്ധാരണക്കുറവ് ഹൃദയസംബന്ധമായ രോഗസാധ്യതയുടെ ആദ്യകാല സൂചനയായിരിക്കാം. പക്ഷേ ഈ ലക്ഷണമുള്ള എല്ലാവര്‍ക്കും ഹൃദ്രോഗമുണ്ടെന്നല്ല അര്‍ഥം. പ്രശ്‌നം ആവര്‍ത്തിക്കുകയോ ദീര്‍ഘകാലം തുടരുകയോ ചെയ്താല്‍ ഡോക്ടറെ കാണേണ്ടതാണ്.
ജോലിഭാരം, ഉറക്കക്കുറവ്, കുടുംബ ഉത്തരവാദിത്തങ്ങള്‍, മാനസിക സമ്മര്‍ദം തുടങ്ങി നിരവധി കാരണങ്ങളാല്‍ സ്ത്രീകള്‍ക്ക് ക്ഷീണം അനുഭവപ്പെടാം. എന്നാല്‍ മതിയായ വിശ്രമം ലഭിച്ചിട്ടും മാറാത്തതോ പതിവില്‍നിന്ന് വ്യത്യസ്തമായതോ ആയ ക്ഷീണം ഉണ്ടാവുകയാണെങ്കില്‍ അത് അവഗണിക്കരുത്. വിളര്‍ച്ച, തൈറോയ്ഡ് പ്രശ്‌നങ്ങള്‍, ഉറക്കത്തകരാറുകള്‍, പ്രമേഹം തുടങ്ങിയവയും ക്ഷീണത്തിന് കാരണമാകാം. ചില സാഹചര്യങ്ങളില്‍ ഹൃദയസംബന്ധമായ പ്രശ്‌നങ്ങളും ഇതിന് പിന്നിലുണ്ടാകാം. പ്രത്യേകിച്ച് അസാധാരണമായ ക്ഷീണത്തോടൊപ്പം ശ്വാസംമുട്ടല്‍, നെഞ്ചിലെ അസ്വസ്ഥത, തലകറക്കം, തണുത്ത വിയര്‍പ്പ് തുടങ്ങിയ ലക്ഷണങ്ങളുണ്ടെങ്കില്‍ കൂടുതല്‍ ശ്രദ്ധ വേണം. സ്ത്രീകളില്‍ ഹൃദയാഘാതം ഉണ്ടാകുമ്പോള്‍ നെഞ്ചുവേദനയ്ക്കൊപ്പം അല്ലെങ്കില്‍ അതിനു പകരമായി മറ്റ് ലക്ഷണങ്ങളും അനുഭവപ്പെടാം.
ഹൃദയാഘാതം സംഭവിക്കുമ്പോള്‍ എപ്പോഴും കടുത്ത നെഞ്ചുവേദന ഉണ്ടാകണമെന്നില്ല. ചിലരില്‍ ലക്ഷണങ്ങള്‍ പതുക്കെ തുടങ്ങുകയും ഇടവിട്ട് അനുഭവപ്പെടുകയും ചെയ്യാം.
ശ്രദ്ധിക്കേണ്ട പ്രധാന ലക്ഷണങ്ങള്‍
ഇവയില്‍ ഏതെങ്കിലും ലക്ഷണം പെട്ടെന്ന് ഉണ്ടാകുകയോ സംശയം തോന്നുകയോ ചെയ്താല്‍ സ്വയം രോഗനിര്‍ണയം നടത്തുകയോ ലക്ഷണം മാറുമോ എന്ന് കാത്തിരിക്കുകയോ ചെയ്യരുത്. ഉടന്‍ അടിയന്തര വൈദ്യസഹായം തേടണം.
പ്രായം കൂടുന്നതിനൊപ്പം ഹൃദയസംബന്ധമായ രോഗങ്ങളുടെ സാധ്യതയും വര്‍ധിക്കാം. എന്നാല്‍ 40 വയസ്സ് കഴിഞ്ഞാല്‍ എല്ലാവര്‍ക്കും ഹൃദ്രോഗമുണ്ടാകുമെന്നോ അതുവരെ ഹൃദ്രോഗസാധ്യതയില്ലെന്നോ കരുതരുത്. ഉയര്‍ന്ന രക്തസമ്മര്‍ദം, പ്രമേഹം, ഉയര്‍ന്ന കൊളസ്ട്രോള്‍, പുകവലി, അമിതവണ്ണം, ശാരീരിക പ്രവര്‍ത്തനങ്ങളുടെ കുറവ്, കുടുംബത്തിലെ ഹൃദ്രോഗചരിത്രം എന്നിവ അപകടസാധ്യതയെ സ്വാധീനിക്കുന്നു. ചെറുപ്പക്കാരിലും ഹൃദയസംബന്ധമായ പ്രശ്‌നങ്ങള്‍ ഉണ്ടാകാം. അതുകൊണ്ട് ലക്ഷണങ്ങള്‍ ഉണ്ടാകുമ്പോള്‍ ആവശ്യമായ പരിശോധനകള്‍ നടത്തുന്നതാണ് നല്ലത്.
ഹൃദയാരോഗ്യം സംരക്ഷിക്കാന്‍ വലിയ മാറ്റങ്ങള്‍ ഒറ്റയടിക്ക് വരുത്തേണ്ടതില്ല. ദൈനംദിന ജീവിതത്തിലെ ചില ശീലങ്ങള്‍ മെച്ചപ്പെടുത്തുന്നത് ഗുണം ചെയ്യും.
ഭക്ഷണത്തില്‍ ശ്രദ്ധിക്കാം
പച്ചക്കറികള്‍, പഴങ്ങള്‍, പയര്‍വര്‍ഗങ്ങള്‍, മുഴുധാന്യങ്ങള്‍, ആവശ്യത്തിന് പ്രോട്ടീന്‍ എന്നിവ ആഹാരത്തില്‍ ഉള്‍പ്പെടുത്തുക. ഉപ്പും അധിക പഞ്ചസാരയും പൂരിത കൊഴുപ്പും കൂടുതലുള്ള ഭക്ഷണങ്ങളുടെ ഉപയോഗം നിയന്ത്രിക്കുക.
വ്യായാമം ശീലമാക്കാം
ആരോഗ്യനില അനുവദിക്കുന്നവര്‍ ആഴ്ചയില്‍ കുറഞ്ഞത് 150 മിനിറ്റ് മിതമായ തീവ്രതയിലുള്ള ശാരീരിക പ്രവര്‍ത്തനങ്ങളില്‍ ഏര്‍പ്പെടാം. തുടക്കത്തില്‍ ചെറിയ നടത്തം മതിയാകും. നിലവിലുള്ള രോഗങ്ങളോ വ്യായാമത്തിന് തടസ്സമാകുന്ന ലക്ഷണങ്ങളോ ഉണ്ടെങ്കില്‍ ഡോക്ടറുടെ നിര്‍ദേശം തേടണം.
ഉറക്കത്തിന് പ്രാധാന്യം നല്‍കാം
മതിയായ ഉറക്കം ശരീരത്തിന്റെ പൊതുവായ ആരോഗ്യത്തിന് ആവശ്യമാണ്. തുടര്‍ച്ചയായ ഉറക്കക്കുറവും പകല്‍ അമിതമായ ക്ഷീണവും ഉണ്ടെങ്കില്‍ കാരണം കണ്ടെത്തണം.
പരിശോധനകള്‍ മുടക്കരുത്
രക്തസമ്മര്‍ദം, രക്തത്തിലെ പഞ്ചസാര, കൊളസ്ട്രോള്‍ തുടങ്ങിയവ ഇടയ്ക്ക് പരിശോധിക്കുക. കുടുംബത്തില്‍ നേരത്തേ ഹൃദ്രോഗമുണ്ടായിട്ടുള്ളവരും പുകവലിക്കുന്നവരും പ്രമേഹമോ ഉയര്‍ന്ന രക്തസമ്മര്‍ദമോ ഉള്ളവരും ഉണ്ടെങ്കില്‍ മുന്‍കരുതലെടുക്കുന്നത് നന്നായിരിക്കും.
പുകവലി ഒഴിവാക്കുക
പുകവലി രക്തക്കുഴലുകളെയും ഹൃദയത്തെയും ദോഷകരമായി ബാധിക്കുന്നു. പുകവലി നിര്‍ത്തുന്നത് ഹൃദയാരോഗ്യം മെച്ചപ്പെടുത്തുന്നതിനുള്ള പ്രധാനപ്പെട്ട വഴിയാണ്.
(ഈ ലേഖനം വിവരങ്ങള്‍ നല്‍കുന്നതിന് വേണ്ടി മാത്രമുള്ളതാണ്. മെഡിക്കല്‍ ഉപദേശത്തിന് പകരമാകില്ല. ആരോഗ്യ സംബന്ധമായ പ്രശ്‌നങ്ങള്‍ക്ക് ഒരു ഡോക്ടറുടെ സേവനം തേടേണ്ടത് അത്യാവശ്യമാണ്)
Content Highlights :Certain physical changes—ranging from erectile dysfunction in men to chronic fatigue in women—may be linked to the health of the heart and blood vessels. What should you look out for?